ယူနိုက်တက်နည်းပြ ဆိုးလ်ရှားက အစဥ်အလာပြိုင်ဘက် လီဗာပူးကို အိမ်ကွင်းမှာ (၅) ဂိုးပြတ်နဲ့ ရှုံးနိမ့်ခဲ့တဲ့ကိစ္စက အတိတ်မှာကျန်ခဲ့ပြီး အခုချိန်မှာ သူ့ရဲ့ကစားသမားတွေက အကောင်းဆုံးရှေ့ဆက်နေပြီလို့ ပြောကြားလာပါတယ်။ ယူနိုက်တက်ရဲ့ အိုးထရက်ဖို့ဒ်နောက်ဆုံးပွဲမှာ လီဗာပူးကို ခြေပြတ်၊ ဂိုးပြတ်ရှုံးနိမ့်ခဲ့တာဖြစ်ပြီး အဲ့ဒီပွဲက ယူနိုက်တက်အတွက် တော်တော်လေး ရှက်စရာကောင်းခဲ့တာပါ။
လီဗာပူးနဲ့ ယူနိုက်တက်က ပရီးမီးယားလိဂ်သမိုင်းတစ်လျှောက်မှာ ခါးသီးတဲ့ အစဥ်အလာပြိုင်ဘက်တွေဖြစ်ခဲ့ပေမယ့် ယူနိုက်တက်တို့ အဲ့ဒီပွဲမှာ ပထမပိုင်းမှာတင် (၄) ဂိုးပြတ်ရှုံးနေခဲ့တဲ့အပြင် ဒုတိယပိုင်းအစမှ လူစားဝင်လာတဲ့ ပေါ့ဘာကလည်း မိနစ် (၆၀) မှာတင် တိုက်ရိုက်အနီကတ်နဲ့ အထုတ်ပယ်ခံခဲ့ရပါတယ်။
ဒီပွဲမှာ ယူနိုက်တက်ရဲ့ခြေစွမ်းက တော်တော်လေး မေးခွန်းထုတ်စရာကောင်းခဲ့ပြီး အိုးထရက်ဖို့ဒ်ရောက် လီဗာပူးပရိသတ်တွေကတော့ ဆိုးလ်ရှားကို ယူနိုက်တက်မှာဆက်ထားဖို့ အော်ဟစ်လှောင်ပြောင်ခဲ့ကြတာပါ။ ဒါပေမယ့် လီဗာပူးနဲ့ပွဲအပြီး နောက်ဆုံးကစားခဲ့တဲ့ စပါး၊ အတ္တလန်တာတို့နဲ့ပွဲမှာ ယူနိုက်တက်တို့ ရှုံးပွဲမရှိခဲ့ပါဘူး။
စပါးကို အဝေးကွင်းမှာ (၃) ဂိုးပြတ်နဲ့ အနိုင်ရရှိခဲ့တဲ့အပြင် ချန်ပီယံလိဂ်အုပ်စုပွဲအဖြစ် အတ္တလန်တာနဲ့ အဝေးကွင်းပွဲမှာလည်း ရော်နယ်ဒိုရဲ့ ဂိုးတွေနဲ့အတူ သရေတစ်မှတ်ရရှိခဲ့ပါတယ်။ အဲ့ဒါကြောင့်လည်း ဆိုးလ်ရှားက “ကျွန်တော်တို့ လီဗာပူးနဲ့ရှုံးပွဲကနေ ရုန်းထွက်လာခဲ့ပါပြီ။ အဲ့ဒီပွဲရလဒ်က သမိုင်းထဲမှာတော့ မျက်နှာပျက်စရာပေါ့”
“ဒါပေမယ့် ကျွန်တော်တို့ ကောင်းမွန်တဲ့ ရက်သတ္တပတ်ဖြစ်လာအောင် ပြန်လည်ကြိုးစားခဲ့ပါတယ်။ အခုလာမယ့် မန်စီးတီးနဲ့ပွဲမှာလည်း အကောင်းဆုံးပုံစံတွေပြနိုင်မယ်လို့ ယုံကြည်ထားပြီးသားပါ။ ဒါက မန်ချက်စတာဒါဘီဖြစ်ပြီး ဘယ်လိုမျိုးပွဲစဥ်လဲဆိုတာကို လူတိုင်းသိထားပါတယ်။ ကျွန်တော်တို့ လီဗာပူးနဲ့ပွဲကို မေ့လိုက်ကြပါပြီ”
“ဒါက ကျွန်တော်တို့ရဲ့ ဘဝတစ်လျှောက်မှာ မှောင်မိုက်တဲ့အခိုက်အတန့်အဖြစ် အမြဲတမ်းရှိနေပါလိမ့်မယ်။ ဒါပေမယ့် နောက်တစ်ပွဲကို သေချာပေါက်ရှေးရှုရပါလိမ့်မယ်။ ကျွန်တော်က ပြီးပြီးသားအကြောင်းတွေကို ပြန်ပြောတတ်တဲ့သူမျိုး မဟုတ်ပါဘူး”
“ကျွန်တော် ဂွါဒီယိုလာကို လေးစားမှုရှိပြီး သူတို့နဲ့တွေ့တဲ့ပွဲတွေမှာ ရလဒ်ကောင်းအချို့ရထားပါတယ်။ ကျွန်တော်တို့အတွက် နောက်ထပ် ကောင်းမွန်တဲ့ စွမ်းဆောင်ရည်တွေကို ဒီပွဲမှာလိုအပ်ပါတယ်” လို့ ပြောကြားသွားခဲ့ပါတယ်။ ယူနိုက်တက်နဲ့မန်စီးတီးတို့ဟာ မနက်ဖြန်ည (၇) နာရီ၊ ယူနိုက်တက် အိမ်ကွင်း အိုးထရက်ဖို့ဒ်မှာ ရင်ဆိုင်ကစားသွားမှာဖြစ်ပါတယ်။