ပီအက်စ်ဂျီကြယ်ပွင့် မက်ဆီရဲ့ နိုက်စ်နဲ့ပွဲက စွမ်းဆောင်ရည်တခုက ပရိသတ်တွေအကြားမှာ တော်တော်လေး ရေပန်းစားနေခဲ့ပါတယ်။ ဒီပွဲမှာ ပီအက်စ်ဂျီက နိုက်စ်ကို မက်ဆီရဲ့ ဖရီးကစ်သွင်းဂိုးတဂိုးအပါအဝင် နိုက်စ်ကို ၂-၁ ဂိုးနဲ့ အနိုင်ရရှိခဲ့တာဖြစ်ပါတယ်။ မက်ဆီရဲ့ ဖရီးကစ်ကန်ချက်ကလည်း နိုက်စ်ဂိုးသမား လှုပ်ချိန်တောင်မရဘဲ လှပကောင်းမွန်ခဲ့ပါတယ်။
ဒါ့အပြင် ဒီပွဲရဲ့ ဒုတိယပိုင်းမှာ မက်ဆီက ပရိသတ်အားလုံး အံ့အားသင့်သွားမယ့် စွမ်းဆောင်ရည်မျိုးကို ပြသခဲ့ပါသေးတယ်။ ပြိုင်ဘက်ကွင်းဘက်ခြမ်းမှာ ဘောလုံးဆွဲပြေးလာခဲ့တဲ့ မက်ဆီဟာ နိုက်စ်ကစားသမားရဲ့ တွန်းတိုက်ချိတ်လှဲမှုကြောင့် လဲကျသွားခဲ့ပါတယ်။ ဒါပေမယ့် မက်ဆီရဲ့ အားထုတ်မှုကိုတော့ ရပ်တန့်သွားစေခဲ့ခြင်းမရှိပါဘူး။
မက်ဆီဟာ ကွင်းမြက်ခင်းပေါ်မှာ လဲနေရင်းနဲ့ပဲ သူအားမသန်တဲ့ ညာခြေနဲ့ အသင်းဖော်နေမာဆီကို ဘောလုံးရောက်အောင် ပေးပို့နိုင်ခဲ့ပါတယ်။ ဒီလိုမျိုး ပေးပို့ခဲ့တဲ့နေရာမှာလည်း မက်ဆီက နေမာကို မကြည့်ဘဲ အဆင်ပြေသလို အနေအထားနဲ့ ပေးပို့ခဲ့ရတာဖြစ်ပြီး နေမာကတော့ မက်ဆီရဲ့ ပေးပို့မှုကို အကောင်းဆုံး ဆယ်ယူကာ တိုက်စစ်ဆက်လက်စတင်ခဲ့တာကို ဗီဒီယိုထဲမှာ မြင်တွေ့ခဲ့ရပါတယ်။
ကွင်းလယ်ဒိုင်လူကြီးကတော့ ဒီဖြစ်ရပ်မှာ ပီအက်စ်ဂျီအတွက် ပြစ်ဒဏ်ဘောသတ်မှတ်ပေးဖို့ အဆင်သင့်ဖြစ်နေခဲ့ပေမယ့် မက်ဆီကတော့ ပြစ်ဒဏ်ဘောရဖို့အရေးကိုပဲ အာရုံမစိုက်ဘဲ တိုက်စစ်လမ်းကြောင်းကို အကောင်းဆုံးစတင်နိုင်အောင် ဖန်တီးပေးခဲ့တာဖြစ်ပါတယ်။ ဒီပွဲက မက်ဆီရဲ့ ဖရီးကစ်သွင်းဂိုးက ချီးကျူးစရာဖြစ်ခဲ့သလို ဒီပေးပို့မှုကလည်း ပရိသတ်တွေအတွက် တော်တော်လေး ချီးမွမ်းခန်းဖွင့်စရာဖြစ်နေပါတယ်။
ပရိသတ်တွေက “ဒါ လူသားတယောက်မဟုတ်ပါဘူး။ လဲကျနေရင်းနဲ့ ကြည့်တောင်မကြည့်ဘဲ ဘောလုံးကို ပေးပို့ခဲ့တာပါ” “ငါ ဒီဗီဒီယိုကို အကြိမ်ပေါင်းများစွာ ပြန်ကြည့်ခဲ့ပြီးပါပြီ။ တော်တော် အံ့အားသင့်စရာပဲ” “အခြားကစားသမားတွေဆိုရင် မက်ဆီနေရာမှာ ဒိုင်ဆီက ပြစ်ဒဏ်ဘောတောင်းတော့မှာပါ။ ဒါပေမယ့် သူက လဲကျနေရင်းနဲ့ ဘောလုံးကို ဆက်ကစားခဲ့ပါတယ်” လို့ အမျိုးမျိုး ချီးကျူးရေးသားလျက်ရှိပါတယ်။