လီဗာပူးကတော့ ဒီပွဲမှာ နောက်တန်းက ဂျိုးဂိုးမက်ဇ်ကို ဗန်ဒိုက်ချ်နဲ့ ပြန်တွဲပေးခဲ့ပြီး အီလီယော့၊ ဖာဘင်ဟို၊ သီယာဂိုတို့နဲ့အတူ တိုက်စစ်ကလည်း ဖေမီနို၊ ဆာလာ၊ ဒါဝင်နူးနက်ဇ်တို့နဲ့ လူစုံလာခဲ့ပါတယ်။ ဆောက်သမ်တန်ကလည်း အမ်းစထရောင်း၊ ချီအဒမ်စ်၊ အယ်လ်ယွန်နက်ဆီ၊ ဝက်ဒ်ပရော့စ်တို့ကို အမာခံထားပြီး အန်ဖီးလ်မှာ လာရောက်ရင်ဆိုင်ခဲ့ပါတယ်။
လီဗာပူးတို့ စောစောစီးစီးပဲ ဦးဆောင်ဂိုးရရှိခဲ့ပြီး ရော်ဘတ်ဆင်ရဲ့ ပြစ်ဒဏ်ဘောကတဆင့် ဖေမီနိုက ခေါင်းတိုက် သွင်းယူခဲ့ပါတယ်။ ဒါပေမယ့် လီဗာပူးတို့ ချက်ချင်းဆိုသလိုပဲ ချေပဂိုးပြန်ပေးခဲ့ရပြီး ဒီဂိုးကိုလည်း ဝက်ဒ်ပရော့စ်ရဲ့ ဖန်တီးပေးမှုကနေ ချီအဒမ်စ်က သွင်းယူခဲ့တာဖြစ်ပါတယ်။ ချေပဂိုးပေးလိုက်ရပေမယ့် လီဗာပူးတို့ တည်တည်ငြိမ်ငြိမ်နဲ့ တုံ့ပြန်ခဲ့ပါတယ်။
ပထမပိုင်းမပြီးခင်မှာတင် အီလီယော့ရဲ့ ဖန်တီးပေးမှုကတဆင့် ဒါဝင်နူးနက်ဇ်က အသင်းအတွက် ဦးဆောင်ဂိုး သွင်းယူပေးနိုင်ခဲ့ပါတယ်။ လီဗာပူးအတွက် နောက်တဂိုးကိုလည်း ပွဲကစားချိန် (၄၁) မိနစ်မှာ ရော်ဘတ်ဆင်ရဲ့ ဖန်တီးပေးမှုကတဆင့် ဒါဝင်နူးနက်ဇ်ကပဲ သွင်းယူနိုင်ခဲ့ပါတယ်။ ဒီဥရုဂွေးတိုက်စစ်မှူးကတော့ ဒီရာသီမှာ ပျမ်းမျှ (၈၈) မိနစ် ကစားပြီးတိုင်း တဂိုး သွင်းယူနိုင်ခဲ့တဲ့ မှတ်တမ်းကိုလည်း ရရှိခဲ့ပါတယ်။
ဒုတိယပိုင်းမှာ ဆောက်သမ်တန်ကလည်း ချေပဂိုးရဖို့ ကြိုးစားခဲ့ပေမယ့် အယ်လစ်ဆန်လည်း လက်စွမ်းပြခဲ့တာကြောင့် လီဗာပူးတို့ ၃-၁ ဂိုးနဲ့ အနိုင်ရရှိခဲ့ပါတယ်။ စပါးကလည်း အိမ်ကွင်းမှာ ဧည့်သည်လိဒ်စ်ရဲ့ အကြိမ်ကြိမ် ဦးဆောင်ခြင်းကို ခံခဲ့ရပေမယ့် ဘန်တန်ကာရဲ့ နောက်ကျသွင်းဂိုးနှစ်ဂိုးကြောင့် နိုင်ပွဲ ရရှိခဲ့ပါတယ်။ ဒီပွဲမှာ လိဒ်စ်က ဆန်းမားဗီလီ၊ ရိုဒရီဂိုတို့ရဲ့ သွင်းဂိုးတွေနဲ့ ဦးဆောင်ခဲ့တာပါ။
စပါးကလည်း ဟယ်ရီကိန်း၊ ဘင်ဒေးဗီးစ်တို့ရဲ့ ချေပဂိုးတွေနဲ့ နောက်ကလိုက်ကစားခဲ့ရပြီး ပွဲကစားချိန် မိနစ် (၈၀) နဲ့ (၈၂) မိနစ်တို့မှာတော့ ဘန်တန်ကာရဲ့ သွင်းဂိုးနှစ်ဂိုးရရှိကာ ကမ္ဘာ့ဖလားမတိုင်ခင် နောက်ဆုံးပွဲမှာ ၄-၃ ဂိုးဆိုတဲ့ အနိုင်ရလဒ်နဲ့ ပိတ်သိမ်းနိုင်ခဲ့ပါတယ်။ အခြားသောပွဲတွေမှာတော့ ဘုန်းမောက်က အဲဗာတန်ကို သုံးဂိုးပြတ်၊ နော်တင်ဟမ်က ခရစ္စတယ်ပဲလေ့စ်ကို တဂိုးဂိုးရှိ၊ လက်စတာက ဝက်စ်ဟမ်းကို အဝေးကွင်းမှာ နှစ်ဂိုးဂိုးမရှိဆိုတဲ့ ရလဒ်တွေနဲ့ အနိုင်ရရှိခဲ့ပါတယ်။