ဘာစီလိုနာအသင်းရဲ့ တိုက်စစ်မှူး လူးဝစ္စဆွာရက်ဇ်က အသင်းဖော်တိုက်စစ်မှူး မက်ဆီဟာ ချန်ပီယံလိဂ်ဆုဖလားတွေကို ဒီထက်မက ပိုမိုရရှိသင့်တဲ့ ကစားသမားဖြစ်တယ်လို့ ပြောဆိုလိုက်ပါတယ်။ ရီးရဲလ်မက်ဒရစ်အသင်း ချန်ပီယံလိဂ်ဖလား (၃)နှစ်ဆက် ရယူအပြီးမှာ ဘာစီလိုနာ အသင်းဟာ ချန်ပီယံလိဂ်ဖလားကို ပြန်လည်ရယူဖို့အတွက် ပစ်မှတ်ထားနေပြီ ဖြစ်ပါတယ်။
ဥရုဂွေးတိုက်စစ်မှူးဆွာရက်ဇ်က မက်ဆီဟာ ချန်ပီယံလိဂ်ဆုဖလားကို (၄)ကြိမ်မက ရရှိသင့်တယ်လို့ ပြောဆိုခဲ့တာ ဖြစ်ပါတယ်။ မက်ဆီဟာ ဘာစီလိုနာအသင်းနဲ့အတူ ချန်ပီယံလိဂ်ဖလားကို ၂၀၀၅-၀၆၊ ၂၀၀၈-၀၉၊ ၂၀၁၀-၁၁၊ ၂၀၁၄-၁၅ တို့မှာ လေးကြိမ် ရရှိခဲ့ပြီး ဆုဖလားနဲ့ ဝေးကွာနေတာဟာ (၃)နှစ်ကြာမြင့်ခဲ့ပြီ ဖြစ်ပါတယ်။
"ချန်ပီယံလိဂ်ပြိုင်ပွဲဟာ ကျွန်တော်တို့အတွက် လေးနက်တဲ့ ပြိုင်ပွဲတစ်ခုပါ၊ ဥရောပရဲ့ အကောင်းဆုံးကစားသမားတွေ ပါဝင်ယှဉ်ပြိုင်နေကြတာပါ၊ ဒီထဲမှာ မက်ဆီလည်း တစ်ဦးအပါအဝင်ဖြစ်ပါတယ်၊ သူက လက်ရှိပိုင်ဆိုင်ထားတဲ့ ဖလားအရေအတွက်ထက် ပိုမိုများပြားတဲ့ အရေအတွက်ကို ပိုင်ဆိုင်ဖို့ ထိုက်တန်သူပါ"
"ပြီးခဲ့တဲ့နှစ် ချန်ပီယံလိဂ်ပြိုင်ပွဲက ထွက်ခဲ့ရအပြီးမှာ ဒီဖလားကို အရပြန်ယူဖို့ သူ့မှာ ဆန္ဒအပြည့်အဝရှိနေပါတယ်၊ သူက ဦးစီးဦးဆောင်ပြုလုပ်နိုင်တဲ့ ကစားသမားတစ်ဦးဖြစ်ပြီး နောက်ထပ်ဆုဖလားတွေ ရရှိဖို့လည်း မျှော်မှန်းနေသူပါ" လို့ ဆွာရက်ဇ်က မက်ဆီနဲ့ ပတ်သက်ပြီး ပြောကြားသွားခဲ့ပါတယ်။
ဘာစီလိုနာအသင်းဟာ ပြိးခဲ့တဲ့ ချန်ပီယံလိဂ်ပြိုင်ပွဲမှာ ရိုးမားအသင်းကို အံ့ဖွယ်အရှုံးရလာဒ်နဲ့ ရှုံးနိမ့်ခဲ့ပြီး ကွာတားဖိုင်နယ်အဆင့်ကနေပဲ ထွက်ခွာခဲ့ရပါတယ်။ ဒီအချိန်မှာ ဘာစီလိုနာရဲ့ အဓိကပြိုင်ဘက် ရီးရဲလ်မက်ဒရစ်ကတော့ ချန်ပီယံလိဂ်ဖလားကို (၃)နှစ်ဆက်တိုက် ဆွတ်ခူးမှု အပါအဝင် (၅)နှစ်အတွင်း (၄)ကြိမ်အထိ ဗိုလ်စွဲခဲ့ပါတယ်။
မက်ဆီအတွက် နောက်ထပ်လိုအပ်ချက်တစ်ခုကတော့ သူ့ရဲ့ အဓိက ကစားသမားပြိုင်ဘက်ဖြစ်တဲ့ ရော်နယ်ဒိုဟာ ချန်ပီယံလိဂ်ဖလားကို (၅)ကြိမ် ပိုင်ဆိုင်ထားတာဖြစ်ပြီး သူ့ထက် တစ်ကြိမ်အသာစီး ရရှိနေမှုဖြစ်ပါတယ်။ ဆွာရက်ဇ်ကတော့ အသင်းဖော် မက်ဆီကို ချန်ပီယံလိဂ်ဖလား ရရှိစေဖို့အတွက် ဆန္ဒရှိနေပြီး ဒီရာသီမှာ အရယူဖို့ ရည်မှန်းနေတယ်လို့ သိရပါတယ်။