ဗြိတိန်အမတ် လေလာမိုရန်က ဗြိတိန်မှာရှိနေတဲ့ ရုရှားသူဌေး (၃၅) ယောက်ရဲ့ ပိုင်ဆိုင်မှုတွေကို ချိတ်ပိတ်သိမ်းဆည်းဖို့အတွက် ပြောဆိုခဲ့တယ်လို့ သိရပါတယ်။ အဲ့ဒီ ရုရှားသူဌေး (၃၅) ယောက်ထဲမှာ ချဲလ်ဆီး ပိုင်ရှင် အေဘရာမိုဗစ်ချ်နဲ့ အဲဗာတန်လေ့ကျင့်ရေးကွင်း စပွန်ဆာ အလစ်ရှာအူစမန်နော့ဗ်တို့လည်း ပါဝင်ခဲ့ပါတယ်။
ခရစ္စဘရိုင်ယန်ကလည်း အေဘရာမိုဗစ်ချ်အနေနဲ့ ချဲလ်ဆီးပိုင်ရှင်အဖြစ် ဆက်မရှိသင့်တော့ဘူးလို့ မနေ့ကပဲ လေသံပစ်ခဲ့တာကြောင့် ချဲလ်ဆီးပရိသတ်တွေကတော့ သူတို့အသင်းနဲ့ ပတ်သက်လို့ စိုးရိမ်မကင်းဖြစ်ခဲ့ကြပါတယ်။ လတ်တလောမှာ အေဘရာမိုဗစ်ချ်က ဗြိတိန်ကို ခြေချခွင့်မရရှိတော့ဘဲ နိုင်ငံရေးပြဿနာတွေကြောင့်လည်း အေဘရာမိုဗစ်ချ်တယောက် ချဲလ်ဆီးကို ရောင်းချဖို့ အရင်တည်းက စဥ်းစားခဲ့ဖူးတယ်လို့ သတင်းတွေက ဖော်ပြခဲ့ပါတယ်။
ရုရှားသမ္မတပူတင်နဲ့ နီးစပ်တဲ့ အေဘရာမိုဗစ်ချ်နဲ့ ဗြိတိန်အစိုးရအကြား (၂၀၁၈) တည်းက တင်းမာမှုတွေရှိခဲ့ပြီး သူ့အနေနဲ့ လက်ရှိအချိန်မှာ အစ္စရေးနိုင်ငံကူးလက်မှတ်ကို ကိုင်ဆောင်ထားသည့်တိုင် ချဲလ်ဆီးရဲ့အိမ်ကွင်းပွဲစဥ်တွေကို လာရောက်မကြည့်ရှုဖြစ် တနည်းပြောရရင် ဗြိတိန်ကို မလာရောက်ဖြစ်တော့ပါဘူး။
ဒါ့အပြင် ဗြိတိန်မှာရှိတဲ့ ရုရှားသူဌေးတွေရဲ့ ပိုင်ဆိုင်မှုအကုန်လုံးကိုသိမ်းဆည်းမယ်ဆိုရင် ချဲလ်ဆီးလည်း ပါဝင်သွားမှာဖြစ်ပေမယ့် နောက်ဆုံးထွက်ပေါ်လာတဲ့သတင်းအရတော့ စိုးရိမ်စရာ မရှိဘူးလို့ ဆိုပါတယ်။ နီးစပ်တဲ့သတင်းရင်းမြစ်တွေက အေဘရာမိုဗစ်ချ်ဟာ သူ့ကို ပိတ်ဆို့အရေးယူမှုတွေ ပြုလုပ်ရအောင် ဘာကိုမှမပြုလုပ်ထားခဲ့ဘူးလို့ သိရပါတယ်။
တကယ်လို့ ဒီလိုမျိုး အရေးယူပိတ်ဆို့မှုတွေရှိလာသည့်တိုင် ရေတိုကာလမှာ ချဲလ်ဆီးကို ဘယ်လိုအကျိုးသက်ရောက်မှုမှရှိစေမှာ မဟုတ်ပါဘူး။ ဥပေဒရေးရာကျွမ်းကျင်သူတွေက တာဝန်ရှိသူတွေအနေနဲ့ ဝန်ထမ်းပေါင်း ထောင်နဲ့ချီ မှီခိုနေရတဲ့ ချဲလ်ဆီးကို ထိခိုက်စေမယ့် အရေးယူမှုတွေ ပြုလုပ်မှာမဟုတ်ဘူးလို့ ယုံကြည်ထားပါတယ်။
ချဲလ်ဆီးအနေနဲ့ သူတို့ရဲ့ လက်ရှိ စီးပွားရေးကို ပုံမှန်အတိုင်း ရှေ့ဆက်နိုင်မှာဖြစ်ပြီး ပရီးမီးယားလိဂ်နဲ့ ယူအီးအက်ဖ်အေတို့ဆီကနေ ရုပ်သံထုတ်လွှင့်ခတွေကို အတားအဆီးမရှိ ဆက်လက်ရရှိကာ ဝန်ထမ်းတွေအတွက် လစာငွေပေးချေနိုင်မှာဖြစ်ပါတယ်။ ဒါပေမယ့် အခြားတဖက်မှာလည်း ပိတ်ဆို့အရေးယူမှုပြုလုပ်ထားတဲ့ လူပုဂ္ဂိုလ် ဒါမှမဟုတ် ကုမ္ပဏီလုပ်ငန်းတွေအတွက် အကျိုးကျေးဇူးဖြစ်စေမယ့် ကိစ္စမျိုးဖြစ်လာနိုင်တာကြောင့် ဒီကိစ္စက လှည့်ကွက်တွေ များပြားနေတယ်လို့ ဆိုရမှာပဲဖြစ်ပါတယ်။