စနေနေ့ နံနက်ပိုင်းအတွက် နောက်ဆုံးရ အပြောင်းအရွှေ့ သတင်းတွေကို စုစည်းဖော်ပြပေးထားတာ ဖြစ်ပါတယ်။
Photo : Goal.com
- အင်တာမီလန်အသင်းဟာ မိုနာကို ကစားသမား ကီတာဘလိတ်ဒ်ကို အငှားနဲ့ ခေါ်ယူနိုင်ဖို့ နီးစပ်နေပြီလို့ သိရပါတယ်။ အငှားခေါ်ယူဖို့ စာချုပ်မှာ အပြီးသတ်ဝယ်ယူခွင့်အတွက် သဘောတူညီချက်လည်း ပါဝင်နေတယ်လို့ သိရပြီး အငှားခေါ်ယူမှုအတွက် ယူရို၅သန်း ပေးချေရမှာဖြစ်ပါတယ်။ အပြီးသတ်ခေါ်ယူချင်ပါက ကီတာအတွက် ယူရို၃၄သန်းအထိ သုံးစွဲရမယ်လို့ သိရပါတယ်။
Photo : Goal.com
- ဘာစီလိုနာ တောင်ပံကစားသမား ဒမ်ဘီလီကို ခေါ်ယူဖို့ ပီအက်စ်ဂျီအသင်းက ကြိုးစားနေတယ်လို့ သိရပါတယ်။ ပရီးမီးယားလိဂ် အပြောင်းအရွှေ့ဈေးကွက် ပိတ်သိမ်းသွားပြီ ဖြစ်တာကြောင့် ဒမ်ဘီလီအတွက် ပီအက်စ်ဂျီအသင်းဟာ ပြိုင်ဘက်မရှိကြိုးစားနိုင်တော့မှာ ဖြစ်ပါတယ်။ ပီအက်စ်ဂျီနည်းပြတူချယ်လ်ကလည်း ဒမ်ဘီလီဟာ အသင်းရဲ့ တိုက်စစ်ကို အကောင်းဆုံးဖြည့်တင်းပေးနိုင်မယ်လို့ ယုံကြည်နေပါတယ်။
Photo : Goal.com
- ဆီဗီလာအသင်းဟာ အေစီမီလန်တိုက်စစ်မှူး အန်ဒရီဆေးဗားလ်ကို ခေါ်ယူဖို့ သဘောတူညီမှု ရရှိသွားခဲ့ပြီလို့ သိရပါတယ်။ ဆေးဗားလ်ဟာ တစ်ရာသီအငှားစာချုပ်နဲ့ ဆီဗီလာကို ပြောင်းရွှေ့မှာ ဖြစ်ပြီး ဆီဗီလာက ယူရို၅သန်းခန့် ပေးချေရမယ်လို့ သိရပါတယ်။ ဒါ့အပြင် ဆေးဗားလ်ကို အပြီးသတ်ခေါ်ယူခွင့်အတွက်လည်း ဆီဗီလာက သဘောတူညီမှု ရရှိခဲ့ပြီး ယူရိုသန်း၃၀ နဲ့ ခေါ်ယူနိုင်မှာ ဖြစ်ပါတယ်။
Photo : Goal.com
- ရီးရဲလ်မက်ဒရစ်ကွင်းလယ်ကစားသမား လူကာမိုဒရစ်ကို အင်တာမီလန်က ခေါ်ယူနိုင်လိမ့်မယ်လို့ အင်တာတောင်ပံကစားသမား ပါရီဆစ်က မျှော်လင့်နေဆဲဖြစ်ပါတယ်။ အင်တာမီလန်အသင်းမှာ ခရိုအေးရှား ကစားသမားတွေဖြစ်တဲ့ ပါရီဆစ်၊ ဘရိုဇွန်ဗစ် နဲ့ ဗာဆယ်ကိုတို့ရှိနေခဲ့ပြီး ဗာဆယ်ကိုကလည်း သူ့ရဲ့ အင်စတာဂရမ်ကတဆင့် မိုဒရစ်ကို ဖိတ်ခေါ်မှုတွေ ပြုလုပ်ခဲ့တယ်လို့ သိရပါတယ်။
Photo : Goal.com
- ချယ်လ်ဆီးအသင်းရဲ့ တိုက်စစ်မှူး ဘတ်ရှူဝါရီဟာ ဗလင်စီယာကို အငှားနဲ့ ပြောင်းရွှေ့ဖို့ သဘောတူညီခဲ့တယ်လို့သိရပါတယ်။ ပြီးခဲ့တဲ့ ဘောလုံးရာသီကလည်း ဒေါ့မွန်အသင်းကို အငှားသွားရောက်ကစားခဲ့ရတဲ့ ဘတ်ရှူဝါရီဟာ နည်းပြဆာရီလက်ထက်မှာလည်း ချယ်လ်ဆီးအတွက် ကစားခွင့်မရရှိပဲ အငှားထပ်မံပြောင်းရွှေ့ခဲ့ရတာ ဖြစ်ပါတယ်။ ဗလင်စီယာတိုက်စစ်မှူး ဇာဇာဟာ တိုရီနီုအသင်းကို ပြောင်းရွှေ့ဖို့ နီးစပ်နေတာကြောင့် ဘတ်ရှူဝါရီကို ခေါ်ယူခဲ့တာ ဖြစ်ပါတယ်။