ယူနိုက်တက် နောက်ခံလူ ဒါလော့က အသင်းရဲ့ တိုက်စစ်မှူး ရော်နယ်ဒို ညွှန်ကြားတဲ့ နေထိုင်စားသောက်မှုပုံစံအတိုင်း လိုက်နာကျင့်သုံးနေပြီလို့ လူသိရှင်ကြား ပြောကြားခဲ့ပါတယ်။ ဒါလော့ဟာ ပေါ်တူဂီမှာလည်း ရော်နယ်ဒိုနဲ့ အသင်းဖော်ဖြစ်ပြီး လက်ရှိနည်းပြ ရန်းနစ်ဂ်ရောက်ရှိလာချိန်မှာ အသင်းရဲ့ ညာနောက်ခံလူနေရာမှာ ပုံမှန်ပွဲထွက်ခွင့်ရရှိနေပါတယ်။
ပြီးခဲ့တဲ့အပတ်က ဆောက်သမ်တန်နဲ့ပွဲမတိုင်ခင်မှာ နည်းပြ ရန်းနစ်ဂ်နဲ့ ရော်နယ်ဒိုတို့က ကစားသမားတွေရဲ့ ကွင်းပြင်ပ နေထိုင်စားသောက်မှုပုံစံကိုပါ အတူတကွ ကြီးကြပ်ဖို့ သဘောတူညီခဲ့ပြီးနောက် ဒါလော့က အခုလိုပဲ ပထမဆုံး ပြောကြားလာတဲ့ ကစားသမားဖြစ်ခဲ့ပါတယ်။ ဒါလော့က ရော်နယ်ဒို သူ့ကို ကော်ဖီများများသောက်ခိုင်းတဲ့အကြောင်းကို အခုလိုပဲ ပြောကြားခဲ့ပါတယ်။
အသက် (၂၂) နှစ်အရွယ် ဒါလော့က “ကစားသမားတိုင်းက သူတို့သန်ရာသန်ရာကို အယူသည်းကြပါလိမ့်မယ်။ အရိုးသားဆုံးပြောရရင်တော့ ကျနော့်ဆီမှာ ဒါမျိုး အများကြီး မရှိခဲ့ပါဘူး။ ဒါပေမယ့် အခုတော့ ကျနော် အမြဲတမ်း အကျင့်တခုရှိလာတော့မှာပါ။ ဒါက ပျော်စရာကောင်းတဲ့ ဇာတ်လမ်းလေးတပုဒ်ဖြစ်ပါလိမ့်မယ်”
“ပွဲမစခင်တွေမှာ ဟိုတယ်မှာရှိနေတဲ့အချိန်တွေဆိုရင် ကျနော်က ရော်နယ်ဒိုနဲ့ အမြဲတမ်း ကော်ဖီသောက်ဖြစ်ပါတယ်။ ဒါက အခုဆိုရင် ပုံမှန်လုပ်နေကျလိုကို ဖြစ်သွားပါပြီ။ သူက ကျနော့်ကို ကော်ဖီသောက်ဖြစ်အောင် ဆွဲခေါ်ခဲ့ပါတယ်။ ဘာလို့လဲဆိုတော့ ကျနော်က ကော်ဖီသိပ်မကြိုက်လို့ပါ။ ဒါပေမယ့် ကျနော် အခု ကော်ဖီသောက်နေပါပြီ”
“စကားလေးပြောရင်းနဲ့ပေါ့။ တခါတလေဆိုရင် ကျနော်တို့ အသင်းဟိုတယ်မှာ အချိန်တွေ အများကြီးပိုနေတာမျိုးရှိတယ်လေ။ အဲ့ဒီအခါကျရင် ကျနော်တို့က အခန်းထဲကထွက်ပြီဂ စကားနည်းနည်းပြော၊ ကော်ဖီသောက်ရင်းနဲ့ ပွဲအပေါ် အာရုံစိုက်နိုင်ဖို့ ကြိုးစားကြတာပေါ့” လို့ ပြောကြားသွားခဲ့ပါတယ်။