ယူရိုပြိုင်ပွဲရဲ့ အိမ်ရှင် ဂျာမနီကတော့ အုပ်စုအဖွင့်ပွဲမှာ စကော့တလန်ကို ၅-၁ ဂိုးနဲ့ အနိုင်ရရှိပြီး အဖွင့်လှသွားခဲ့ပါတယ်။ ဒီပွဲမှာ ဂျာမနီအတွက် ဂိုးတွေကို ဖလော်ရီယန်ဝစ်ဇ်၊ မူဆီအာလာ၊ ကိုင်ဟာဗက်ဇ်နဲ့ ဖူလ်ရက်ဂ်တို့က သွင်းယူပေးခဲ့တာပါ။
ပထမပိုင်း (၁၀) မိနစ်မှာကတည်းက ကင်မစ်ချ် ခင်းပေးလိုက်တဲ့ ဘောလုံးကို ဖလော်ရီယန်ဝစ်ဇ်က ဧရိယာအပြင်ကနေ ကန်သွင်းပြီး အဖွင့်ဂိုးရခဲ့ပါတယ်။ အဲ့ဒီနောက် (၉) မိနစ်အကြာမှာ မူဆီအာလာက ဟာဗက်ဇ် ခင်းပေးတဲ့ ဘောလုံးကို အမှားအယွင်းမရှိ အဆုံးသတ်ခဲ့ပါတယ်။
ပထမပိုင်းပြီးခါနီးမှာ ဂျာမနီတို့ ပင်နယ်တီထပ်ရခဲ့ပါတယ်။ ဒီဖြစ်ရပ်မှာ ဂွန်ဒိုဂန်ကို ခြေစုံပစ်ဝင်တဲ့ စကော့တလန် နောက်ခံလူ ပေါ်တီယက်စ်ပါ တိုက်ရိုက်အနီကတ် ထိသွားခဲ့ပါတယ်။ ဒီပင်နယ်တီကိုလည်း ဟာဗက်ဇ်က အမှားအယွင်းမရှိ ကန်သွင်းခဲ့ပါတယ်။
ဒုတိယပိုင်းမှာလည်း ဂျာမနီတို့ ဖိအားကင်းကင်းနဲ့ ထိန်းကစားသွားခဲ့ပါတယ်။ ဖူလ်ရက်ဂ်၊ အမ်မရီကန်တို့က နောက်ထပ်ဂိုးတွေ ထပ်သွင်းပေးခဲ့ပြီး ရူဒီဂါက ကိုယ့်ဂိုးကိုယ် သွင်းမိခဲ့ပါတယ်။ ဒါ့အပြင် ဒီပွဲမှာ စကော့တလန် ဂိုးသမား လက်စွမ်းပြခဲ့တာကြောင့်သာ ဒီထက် ဂိုးပိုမပြတ်ခဲ့တာပါ။
ဒုတိယပိုင်းမှာ ဂျာမနီဘက်က လူစားဝင်လာတဲ့ ဆာနေး၊ ဖူလ်ရက်ဂ်၊ မူလာ၊ အမ်မရီကန်တို့ကလည်း စကော့တလန်နောက်တန်းကို ဆက်တိုက် ဒုက္ခပေးခဲ့ပါတယ်။ ဂျာမနီကတော့ ဒီပွဲရလဒ်ကြောင့် နောက်တစ်ဆင့်အတွက် အခြေအနေကောင်းသွားခဲ့ပြီး ချန်ပီယံဆုအတွက် ပိုမိုရေပန်းစားလာပါတယ်။